لوګر کې پر سلګونه کاریګرو د کار په بدل کې نغدې پیسې ووېشل شوې

۲۸ لړم ۱۴۰۲ه‍.ش
۶ جُمَادَى الأول ۱۴۴۵ ه‍.ق
د لوګر ولایت په مرکز پُل علم، خروار او محمدآغې ولسوالیو کې هغه سلګونه کاریګرو ته، چې په بېلابېلو کرنیزو پروژو کې په کار بوخت دي نغدې پیسې ورکول کېږي.
یادې پروژې د لوګر ولایت د کرنې مدیریت تر څار لاندې، د پُل علم ښار، خروار او محمدآغې ولسوالیو پر بېلابېلو سیمو کې پیل شوي، چې مالي او تخنیکي چارې یې د خوړو نړیوال پروګرام له لارې د بشري ځواک د پراختیا ادارې له لوري سمبال شوي دي.
د لوګر ولایت د کرنې، اوبولګولو او مالدارۍ ریاست د طبیعي سرچینو آمر نصیرالدین بهیج د معلوماتو له مخې په دغو پروژو کې ۲۶۳ تنه ګاریګر د تراسونو په کېندلو او کانالونو پاکولو بوخت دي، چې هر کاریګر ته ۶ زره ۴۰۰ افغانۍ د میاشتني معاش په توګه ورکول کېږي.
ددغو پروژو د پلي کولو موخه د اوبو د ضایعاتو مخنیوی، د بزګرانو کروندو ته پروخت د اوبو رسول، خلکو ته د کار زمینه برابرول او په ټوله کې د اوبو مدیریت دی.