د ځمکوالۍ په تخنیکي او حقوقي برخو کې د ختیځ زون کارکوونکي وروزل شول

د کرنې، اوبولګولو او مالدارۍ وزارت د ځمکو چارو ریاست مسؤلین او متخصصینو د ختیځ زون ( ننګرهار، لغمان، کنر او نورستان) ولایتونو  د تصفیې، استملاک، سروې کدستر، د ځمکو انتقال او تبادله، د ځمکو معلوماتي سیستم او ځمکې بانک ریاست کارکوونکو لپاره د ځمکو په تخنیکي او حقوقي برخو کې درې ورځنۍ روزنیز پروګرام، پای ته ورسېد.
د پروګرام په پیل کې د کرنې، اوبولګولو او مالدارۍ وزارت د ځمکو ادارې د تصفیې او تثبيت د مالکیت دحق رییس مولوي ضیاء الحق ضیاء له ولایتونو څخه راغلي کډونوالو ته ښه راغلاست وویل او د ښوونکو له زیار او کوښښ څخه یې هم مننه وکړه.
د تصفیې او د مالکیت د تثبيت دحق رییس وویل: «زما غوښتنه له ټولو همكارانو څخه دا ده، چې په دغه درې ورځني سیمینار کې مو کوم څه چې له ښوونکو څخه زده کړي وي په خپلو ولایاتو کې نورو همکارانو ته هم زده کړی». نوموړي زياته کړه: «که چیرې یو کارمند د یوه سړي حق بل ته ورکوي او د هغه په بدل کې یو څه ترې اخلي امکان یې شته چې په دنیا کې به دا سړی تر یو لنډ وخته پورې راحته وي خو که بلې خواته فکر وکړو موږ او تاسې خو تر قیامته پورې ژوندي نه یو او بلاخره د حساب ورځ هم راتلونکې ده بیا به څه کوو زمونږ د هرې ورځې هم د خدمت او هم د خیانت حساب به له مونږه سره کېږي، نو راځئ، چې ټول په ګډه د دې وطن او خلکو د خدمت لپاره زیار او کوښښ وکړو او هېڅ کله هم پرې نږدو چې دا وطن یو ځلې بیا د ناخوالو سره مخامخ شي.»
ورپسې د ارزونې، استملاک او بیا مېشتېدنې او د ځمکو د انتقال او تبادلې په برخو کې کارکوونکو ته سیمینار دائر او د ګدونوالو پوښتنو ته ځوابونه هم ورکړل شول شو.
د ختیځ زون ( ننګرهار، لغمان، کونړ او نورستان )  ولايتونو د ځمکو تخنیکي برخې آمرينو د ختیځ زون کارکوونکو په استازیتوب خبرې وکړې او د مسؤولینو او ښوونکو څخه مننه وکړه.
په پای د جیوديزي او کدستر رییس مولوي سعيد الرحمن مظهري د ننګرهار ولايت د کرنې ریاست رهبرۍ او د دغه ریاست له ټولو کارکوونکو او همداراز د کونړ، لغمان او نورستان څخه راغلي ګدونوالو د شتون او زغم څخه د زړه له کومې مننه وکړه او له ټولو کارکوونکو نه یې وغوښتل، چې له دې فرست نه په استفاده سره د هېواد د سوکالۍ او پراختیا کې خپلې هڅې ګړندی کړي.
د غونډې په پای کې کارکوونکو ته د مسؤولینو له لورې د تصدیق نامو په ورکولو او د غیر رسمي ښاري سیمو د ثبت رییس مولوي عبدالصمد پاڅون لخواه په دعا سره د ختیځ زون د ځمکو چارو په برخه کې درې ورځنۍ علمي ورکشاپ پای ته ورسېد.