د هلمند ګرشک مېله بازار کې حیواني او کرنیز درمل پلورنځي وتړل شول
۱۱ تله ۱۴۰۲ه.ش
١۸ ربیع‌الاول ۱۴۴۵ه.ق
دهلمند ولایت د کرنې، اوبولګولو او مالدارۍ ریاست، د کرنیزو خدمتونو آمریت اړوند د بوټیو ساتنې او قرنطین مدیریت له لوري په دې ولایت کې په غیر اصولي او غیر مسلکي ډول د کرنیز او حیواني درملو د پیر او پلور مخنیوی کمپاین په دوام د ګرشک ولسوالی د دوشنبې مېله بازار کې ګڼ شمېر کرنیز او حیواني درمل پلورنځي وتړل شول.
دغه پروسه د یوه ګډ پلاوي لخوا چې په ترکیب کې یې د ولایت مقام، امنیې قومندانۍ، مستوفیت، چاپېریال ساتنې او کرنې ریاست استازې شامل دي.
د هلمند ولایت کرنې ریاست هڅه کوي، چې د حیواني او کرنیزو درملو د پیر او پلور ټول مراکز په فني او مسلکي ډول را جوړې کړي ترڅو د کرنې وزارت د ځانګړې کړنلارې او هدایت له مخې ځمکوال او مالدار د تر وخت تېرو، بې کیفیته او کیمیاوي زهرجنو موادو له احتمالي خطراتو څخه خوندي شي.
ددې ترڅنګ هغه درمل پلورونکي چې په بازارونو کې دوکانونه لري خپل جواز لیکونه به دطرزالعمل مطابق دکرنې ریاست څخه ترلاسه کوي، کوم درمل ځایونه چې د کار کولو جوازونه ونه لري فعالیت یې بندېږي.
