د ځمکوالۍ په تخنیکي او حقوقي برخو کې د سوېل ختیځ زون کارکوونکي روزل کېږي

۱۰ تله ۱۴۰۲ه‍.ش
١۷ ربیع‌الاول ۱۴۴۵ه‍.ق
د کرنې، اوبولګولو او مالدارۍ وزارت د ځمکو چارو ریاست مسؤلین او متخصصینو د سوېل ختيځ زون ( پکتیا، خوست، پکتیکا او غزني) ولایتونو  د تصفیې، استملاک، سروې کدستر، د ځمکو انتقال او تبادله، د ځمکو معلوماتي سیستم او بانک زمین ریاست کارکوونکو لپاره د ځمکو په تخنیکي او حقوقي برخو کې درې ورځنی روزنیز پروګرام د پکتیا ولایت د کرنې، اوبولګولو او مالدارۍریاست په تالار کې دائر کړ.
په دې پروګرام کې د ځمکو چارو ریاست د ارزونی، استملاک او بیا مېشتدنې رییس مولوي حضرت محمد طیب، د ځمکو د انتقال او توزیع رئیس مولوي سید محمد سعید، د استملاکي پروژو د همغږۍ رییس الحاج شاه جهان جلات او د ځمکو معلوماتي سیستم او سروې کدستر څانګو یو شمېر متخصصینو او د پکتیا، خوست، غزني او پکتیکا ولایتونو څخه دغه ورکشاپ ته راغلو کارکوونکو هم برخه اخیستې وه.
په پیل کې د پکتيا ولايت د کرنې، اوبولګولو او مالدارۍ ریاست رییس الحاج مولوي عبدالروف سعید له مرکز څخه راغلو مسؤلین، متخصصین او ولایتي کارکوونکو ته د ښه راغلاست ترڅنګ د هغو حضور څخه مننه وکړه او ویې ویل: دغه ورکشاپ به د هغو کارکوونکو لپاره چې په دې وروستیو کې په دې څانګو کې نوي ګمارل شوي یو ارزښتناک ګام وي نوموړي همدا راز له ټولو کارکوونکو وغوښتل چې له دغه ورکشاپ څخه د خپل علمي کچې د لوړولو په پار د ځمکوالۍ چارو په تخنیکي او حقوقي برخو کې اعظمي ګټه پورته کړي.
 ښاغلي سعید زیاته کړه څرنګه چې معلومه ده زمونږ همکاران د ځمکوالۍ په برخه کې له زیاتو ستونزو سره مخ دي نو زما غوښتنه له ټولو نه داده چه له دې ورکشاپ نه د خپلو ستونزو د حل لپاره ګټوره استفاده وکړي. 
ورپسې د اراضی ریاست د ارزونې، استملاک او بیا مېشتدنې رییس مولوي حضرت محمد طیب کارکونکو ته په ورسپارل شویو دندو کې په شفافیت، اخلاص او صداقت او له مراجعینو سره د ښه چلند په اړه یادونه وکړه او ویې ویل چې اوسنۍ دنده ټولو ته یو امانت دی چې له پخوا نه مونږ ته پاتي دی او دغه امانت باید چه په اخلاص او سمه توګه راتلونکي نسلونو ته انتقال کړو. د استملاک رییس د پروګرام په ارزښت خبرې وکړې وویل دغه ورکشاپ د کارکوونکو د علمي کچې د لوړولو، د عامه ګټو د پوهاوی او د پروژو د ښه تطبيق په موخه په لاره اچول شوى دى.
د یادونې ده یاد پروګرام چې د هېواد په سوېل ختیځ زون (پکتیا ولایت د کرنې په ریاست) کې په لاره اچول شوى، درې ورځې دوام لري، چې د استملاکي پروژو د انسجام رییس  شاه جهان جلات، د ځمکو د انتقال او تبادله آمر غلام رباني شینوارۍ، د کدستر آمر احمد فواد ميران، د ځمکو د بانک آمر محمد یاسین ستانکزی او د استملاک ریاست ساحوي کنترول عمومي مدیر علي جان ځاځی کارکوونکو ته د ښوونکو په توګه د ځمکوالۍ چارو په بیلابیلو برخو کې په مفصل ډول معلومات وړاندې کړي.