د لغمان الینګار کې د کاهو ننداریزې کروندې جوړېږي
۱ وږی ۱۴۰۲ه.ش
۶ صَفَرُ المُظَفَّر ۱۴۴۵ه.ق
د لغمان د کرنې، اوبولګولو او مالدارۍ ریاست د ډاکار خیریه مؤسسې په همکارۍ ددې ولایت د الینګار په ولسوالی کې پر ۲۰ تنه بزګرانو د کاهو د ننداریزو کروندو جوړولو په موخه اصلاح شوې تخمونه وېشل شوي دي.
د چارواکو په خبره ددې مرستې په ترڅ کې هر بزګر ته یوه جریبه ځمکې لپاره د کاهو اصلاح شوي تخمونه ورکړل شوي دي او ترڅنګ یې یادو بزګرانو ته د کاهو د بزغلې د کرلو، اوبولګولو او سیمې ته انتقال په برخه کې معلومات هو ورکړل شوي دي.
یادو بزګرانو ته به د پلان مطابق اصلي کروندو ته د بزغلیو له انتقال سره سم ۵۰ کیلوګرامه یوریا او ۲۵ کیلوګرامه ډی ای پی سره چې د یوه جریبه ځمکې ضرورت پوره کوي هم وېشل کېږي.
د لغمان دکرنې ریاست په لارښونه او د الینګار ولسوالی د زیارګښو بزګرانو په هلوځلو اوسمهال د کاهو کښت الینګار ولسوالی کې په چټکې سره پراختیا مومي. لاسته راغلي پایلې ښیې چې دغه ولسوالی کې کاهو ښه پایله ورکړې ده، په همدی اساس یې د ترویج لپاره ګړندۍ هڅی روانې دي.
