دکابل خاک جبار ولسوالی کې ۲۳ بېوزلو او معلولو کورنیو ته نسلي وزې ووېشل شوې
۲۲ وږی ۱۴۰۴ هـ.ش
۲۰ رَبِیعُ الْأَوَّل ۱۴۴۷ هـ.ق
د کابل د کرنې، اوبو لګولو او مالدارۍ ریاست د هڅو په پایله کې، د«ډي.آر.سي» مؤسسې په مالي او د «آر.آر.اې.اې» مؤسسې په تخنیکي همکارۍ د کابل ولایت د خاک جبار ولسوالی په بېلابېلو کلیو کې ۲۳ بېوزلو، بېسرپرسته او معلولو کورنیو ته نسلي وزې ووېشل شوې.
د کابل دکرنې ریاست چارواکي وویل، چې د یادې مرستې لپاره د نوم لیکنې لړۍ وړاندې تر سره شوې وه او اوس هرې مستحقې کورنۍ ته دوه راسه نسلي وزې ورکړل شوې، څو خپلې لبنیاتي اړتیاوې پوره او اضافه محصولات یې بازار ته وړاندې کړي.
د دوی په خبره، د دې مرستې موخه د بېوزلو او بېسرپرسته کورنیو اقتصادي پیاوړتیا، مېرمنو ته کور دننه د کار زمینه برابرول او د هغوی د عایداتو د کچې لوړول دي، ترڅو په راتلونکي کې د اړتیا پر وخت پر ځان بسیا شي.
د یادو کورنیو د ټاکلو او وېش چارې د ګډو کمېټو لخوا په روڼ او شفاف ډول ترسره شوي، ترڅو مرسته یوازې مستحقو او اړمنو کورنیو ته ورسېږي.
دا اقدام د بېوزلو کورنیو د اقتصاد د پیاوړتیا او د هغوی لپاره د دوامداره عاید رامنځته کولو په موخه ترسره کېږي.
