د ننګرهار دکرنې رییس: ټول خیره بنسټونه او همکارې مؤسسې دې له سېلاب ځپلو سره بېړنۍ مرستې وکړي
۴ زمری ۱۴۰۱ ه.ش
۲۷ ذوالحجَّة ۱۴۴۳ ه.ق
د ننګرهار دکرنې، اوبولګولو او مالدارۍ رییس مولوی عبدالستار محمد په داسې حال کې، چې د پېښو پر وړاندې د چمتوالې ادارې رییس مولوی خالد یي ملتیا کوله د ننګرهار وایت د کوټ، بټي کوټ او مهمندرې ولسوالیو له هغو سیمو څخه لیدنه وکړه چې په وروستیو کې د زیاتو اورښتونو او سېلابونو له امله زیانمن شوي دي.
د ننګرهار دکرنې رییس مولوی عبدالستار محمد وویل، چې ورته ځاني او مالي زیانونه په بهسود، سرخرود، اچین، سپین غر، کوزکونړ او روداتو ولسوالیو کې هم هېوادوالو ته اوښتي دي، چې زیاته کچه کرنیزې ځمکې او مالدارۍ زیانمن او همدارنګه یو شمېر کورونه هم تخریب شوي دي.
ښاغلی محمد په ټولو خیره بنسټونو او همکارو مؤسسو غږ وکړ، چې زیانمن شویو کورنیو سره دې بېړنۍ مرستې وکړي.
باید وویل شي، چې په دې وروستیو کې د هېواد په یوشمېر ولایتونو کې د اورښتونو له امله سېلابونه راوتلي دي، چې ډېری کرنیزې ځمکې، بڼونه او کورنه یې تخریب کړي دي، په همدې موخه د اسلامي امارت مشرتابه دکرنې وزارت ته دنده سپارلې ده، چې د سېلاب ځپلو کورنیو سروې دې ترسره او له دوی سره اړینې مرستې وشي.
