کندهار کې د زېرې کښت مخ په غوړېدو دی

۳ مرغومي ۱۳۹۹
د کندهار د کرنې، اوبولګولو او مالدارۍ ریاست چارواکي وایي، چې د ګڼو مېوو او سابو تر څنګ په یاد ولایت کې د زېرې کښت مخ په ډېرېدو دی او حاصلات یې کال تربلې زیاتیږي.
د کندهار د کرنې، اوبولګولو او مالدارۍ ریاست چارواکي وایي، چې سږ کال ددې ولایت د مرکز په ګډون د نېش، دامان، خاکریز، شاولیکوټ، تخته پول او سپین بولدک ولسوالیو په یوزرو او ۱۴۵ هکټاره ځمکه کې توره او سپینه زیره کرل شوې وه، چې له یادو کروندو څخه نږدې یوزرو او ۲۶۰ ټنه زیره راټوله شوې ده.
د دوی په خبره په تېرو کلونو کې هم په دې ولایت کې یوشمېر بزګرانو په خپلو کروندو کې زیره کرلې وه، چې د قناعت وړ حاصل یې ترلاسه کړي دي.
زیره، چې په اصل کې یو غرنۍ بوټی دی، ځانګړې اقلیمي شرایطو ته اړتیا نه لري، نو په همدې موخه د افغانستان په ډېرو سیمو کې یې کرکېله دود شوی دی. کندهار، جوزجان، بلخ، غور او ارزګان د زیرې کرکېلي لپاره غوره اقلیمي شرایط لري او له یادو ولایتونو څخه هرکال په زرګونه ټنه زېره راټول او بازار ته وړاندې کیږي.
له زیرې څخه په خوړو او طبابت کې ګټه اخیستل کیږي او په کور د ننه او بهر ښه مارکېټ هم لري.