کندز کې د ژمني تېلو او لایم سلفر د استعمال کمپاین پیل شو
۱۸ سلواغه ۱۴۰۴ه.ش
۱۹ شَعبان المُعَظّم ۱۴۴۷ه.ق
د کرنې، اوبولګولو او مالدارۍ وزارت د بوټو ساتنې او قرنطین ریاست د پلان او د کندز ولایت د کرنې، اوبولګولو او مالدارۍ رییس مولوي نیازمحمد عابد د لارښوونې له مخې، د ژمني تېلو او لایم سلفر د استعمال تعلیمي او عملي کمپاین د دې ولایت په مرکز او ولسوالیو کې پیل شو.
یاد کمپاین د کندز ولایت د کرنې، اوبولګولو او مالدارۍ ریاست د بوټوساتنې او قرنطین د عمومي مدیریت له لوري د ترتیب شوي پلان پر بنسټ عملي کېږي، چې موخه یې د بڼوالو او تاکدارانو ته د یادو محلولونو د جوړولو او وقایوي استعمال طریقې ښودل دي، تر څو د مېوه لرونکو ونو او د انګورو د تاکونو د نباتي ناروغیو او آفتونو پر ضد ترې اغېزمنه ګټه واخیستل شي.
په همدې لړ کې، د بوټو ساتنې مسلکي کارکوونکو د کندز ولایت د مرکز اړوند د شورآبي په کلي کې عملي پروګرام پیل کړ او د یوې تعلیمي برنامې په ترڅ کې یې د یاد ریاست له امکاناتو څخه په استفادې ۲۰۰ لیتره ژمنی تیل تیار کړ او بڼوالو ته یې د هغه د جوړولو او استعمال طریقه وښوده.
د یادونې وړ ده، چې د ترتیب شوي پلان له مخې، په مجموع کې له ۲۵۰۰ لیتره څخه زیات ژمنی تیل او ۲۰۰۰ لیتره لایم سلفر به د ولایت په بېلابېلو سیمو کې بڼوالو ته تیار او د هغه د وقایوي استعمال طریقه به په عملي ډول ور وښودل شي، تر څو د نباتي ناروغیو او آفتونو د مخنیوي او کنټرول په برخه کې ترې اغېزمنه استفاده وشي.
