دننګرهار کانال شرکت په زرګونه جریبه ځمکه کې اصلاح شوي غنم کرل شوي
۲۹ وری ۱۴۰۳ه.ش
۸ شَوّال المُکَرَّم ۱۴۴۵ه.ق
د ننګرهار کانال ریاست چارواکي وایي، چې ددې شرکت اړوند په څلور ګونو فارمونو کې په نږدې اووه زره جریبه ځمکه کې د غنمو اصلاح شوي تخمونه کرل شوي دي.
د ننګرهارکانال شرکت رییس مولوي غلام الرحمن کظیم وویل، چې د کانال شرکت د څلورګونو فارمونو په نږدې اووه زره جریبه ځمکه کې د غنمو اصلاح شوي تخمونه کرل شوي، چې د غنمو د حاصلاتو په زیاتوالي کې به رغنده رول ولوبوي.
د چارواکو په خبره د کرل شویو غنمو د دویمې دورې څارنه ترسره او په برياليتوب سره پای ته ورسېده .
دغه څارنه د ننګرهار د کرنې، اوبولګولو او مالدارۍ ریاست تخمونو ته د تصدیق ورکونې امریت د تخینکي او فني مسولینو او ننګرهار وادي کرنیز شرکت د استازو په ملتيا ترسره شوه.
اصلاح شوي تخمونه د سیمه ییزو او غیر اصلاح شویو تخمونو په پرتله څو سلنه لوړ حاصلات ورکوي، چې تر څنګ یې د نباتي ناروغیو په مقابل کې هم ډېر مقاومت لري.