خوست کې د کرنې او مالدارۍ پراختیا په پار سکټوري غونډه دائره شوه
٢٧ غبرګولی ۱۴۰۲ه.ش
٢٨ ذو القعدة ۱۴۴۴ ه.ق
د خوست ولایت دکرنې، اوبولګولو او مالدارۍ ریاست چارواکي وایي، چې ددې ولايت دکرنې ریاست سره د همکارو بنسټونو، مؤسسو او نهادونو سره سکټوري غونډه کې، پر بېلابېلو موضوعاتو خبرې اترې وشوې.
د غونډې په پيل کې د خوست دکرنې، اوبولګولو او مالدارۍ رییس مولوی محمدزمان عمري دتېر سکټوري غونډې د ورسپارل شویو اجرااتو لنډه کتنه وکړه، ورپسې دسکټوري غونډې د جوړولو پر اهمیت او هم دسکټوري غونډې پر بناُ د اړوند اداراتو او موسسا تو ترمنځ د ښې همغږۍ په جوړولو خبرې وکړې او زیاته یې کړه: "تاسو دغه مظلوم ولس لپاره دکرنې او مالدارۍ په برخو کې په تېره میاشت کې ښه خدامات وړاندې کړي دي، دبېلګې په توګه دقلندر ولسوالی، چې د خداماتو څخه محرومه وه تاسو توانیدل، چې خپل خدامات پکې پیل کړئ تاسو څخه مننه کوم."
ښاغلی عمري د غونډې ګډونوالو ته په خطاب کې وویل، چې داسې پروژې پلي کړی، چې ولس ته یې بنیادي ګټه ورسېږي ترڅو ولس ته د زیات وخت لپاره مصروفیت پیدا شي.
مولوي محمد زمان عمري د کرنې او مالدارۍ په برخه کې له فعالو مؤسسو د بڼونو، کانالونه او سربندونه رغول او ترڅنګ یې دنیالګیو پیوند کول او نورو مثمرو پروژو غوښتنه وکړه.
په دې غونډه کې د خوست د کرنې ریاست د پلان او برنامو عمومي مسوُل له خوا د راپور ورکولو نوې بنه او هم د اقتصاد ریاست له لوری راغلي هدایات دغونډې ګډونوالو ته تشریح کړل.
همدارنګه دسکټوري اداراتو مسوّلینو ( مهاجرینو، چاپېریال ساتنې، شمل خرم، کلیوپراختیا، د ولایت مقام) هم خبرې وکړې او د غونډې ګډونوالو سره خپل نظرونه او وړاندیزونه شریک کړل.
په همدې حال کې د مؤسسو استازو په خپل وارسره دکرنې،مالدارې، ځنګلونو او څړځايونو په برخه کې د خپلو فعالیتونو راپور د غونډې ګډونوالو سره شریک کړل.
