لغمان کې د ځمکې غصب او غصب شويو ځمکو بېرته راکرځولو کمېټې غونډه دائره شوه
لغمان کې د ځمکې غصب او غصب شويو ځمکو بېرته راکرځولو کمېټې غړو د لغمان دکرنې رييس مولوی محمد ولي محسن په مشرۍ د لغمان د ولایت مقام په مېلمستون کې غونډه دائره کړه.
د غونډې په پيل کې د لغمان دکرنې رييس او د کمېټې مشر مولوي محمدولي محسن لارښوونکې وینا ویلو ترڅنګ د تېرې غونډی دپریکړو دتطبیق ارزونه وکړه.
په دې غونډه کې په امارتي ځمکو کې د اشخاصو د نوي تصرفاتو دمخنیوي په هکله خبرې وشوې او په دې هکله د امنیه قوماندانۍ استازي ته سپارښتنه وشوه، چې خپلو امنیتي حوزو مسؤلینو ته لارښوونه وکړي ترڅو داشخاصو د نویوتصرفاتو څخه مخنیوی وکړي.
ورته مهال په غونډه کې د لغمان مرکز مهترلام اړوند R6 پلاني سیمه کې یوشمېر هغه کسانو ګډون وکړه، چې رهایشی نمرې ور ته وېشل شوې خو د لیوا له لوري یې د امنیتي حریم په نوم د تصرفاتو مخنیوی کېږي دنوموړو رهایشي نمرو مالکان لومړی ولایت مقام ته عارض شوې وه، چې د ولایت مقام له لوري یې عریضه تخنیکي پلاوی ته راجع شوې وه په نوموړې موضوع بحث او خبرې وشوې.
باید وویل شي، چې د لغمان ولایت د ځمکې د غصب مخنیوی او غصب شویو ځمکو د بېرته راګرځولو کمېټه تر دې دمه په دې ولایت کې د ډېرو ځمکو د غصب مخه نیولی او ترڅنګ یې ډېر غصب شوي ځمکې بېرته راګرځولي دي.
