کونړکې د سویابینو کرکیلې ترویج په پار هڅې

د کونړ ولایت د کرنې، اوبولګولو او مالدارۍ ریاست په هلو ځلو د ملګرو ملتونو د خوړو او کرنې ادارې «FAO» په مالي او د «RRAA» مؤسسې په تخنیکي همکارۍ ددې ولایت د نورګل ولسوالی پر ۲۵۰ بزګرانو د سویابینو تخمونه، کیمیاوي سرې او د سویابنو کروندو خوندي کولو په پار کرنیز درمل وېشل شوي دي.
د یاد پروګرام په ترڅ کې ګټه اخیستونکو بزګرو ته د سویابینو د اقتصادي، طبیعي او غذایي ارزښت ترڅنګ، د کرلو، اوبو لګولو، د سرو استعمال اوخشاوې په هکله روزنه هم ورکړل شوې ده. 
د کونړ د کرنې ریاست هڅه کوي، چې کونړ کې سویابین ترویج کړي او په راتلونکو کلونو کې دا لړۍ نوره هم وغځوي او د ولایت په کچه ترې ټول ځمکوال برخمن کړي.
سویابین بشپړه پروتیني او مغذي مواد لري، د کورنیو د روغتیا په ځانګړي ډول د ماشومانو د خوارځواکۍ په مخنیوي کې رغنده رول لري.