شنې خونې د بزګرانو د عوایدو غوره سرچینې
د ننګرهار کانال ریاست چارواکي وایي، په ټولو موسمونو کې سابه او ترکاریو ته د ننګرهار د خلکو د لاس رسي، د موسمي تولیداتو زیاتوالی او په بازارونو کې د کرنیزو حاصلاتو د ډېرښت په پار ددې ریاست اړوندو ځمکو کې شنې خونې جوړې شوي دي.
د چارواکو په خبره د ننګرهار کانال له ۱۰۱ شنوخونو څخه ۸۶ زره او ۵۷۱ منه بادرنګ راټول او ددې ولایت په هټیو کې پلور ته وړاندې شوي دي.
د ننګرهار دکانال ریاست چارواکي وایي، چې دکرنې وزارت د پرمختیایي برنامو او پروژو له لارې په دې ولایت کې د لوړ ارزښت لرونکو کرنیزو محصولاتو او د سبو او ترکاریو د کرکېلي د نویو لارو چارو دودولو په پار ددې ولایت په کچه سلګونه لوی او کوچني شنې خونې جوړې شوي دي، په یوه کال کې دوه فصله ورکوي، چې تر ډېره په کې بادرنګ او رومي بانجان کرل کېږي.
له تېرو څو ورځو راهیسې سابه (سبزۍ) لکه بادرنګ او رومیان چې د ننګرهار په شنو خونو کې راټوکېدلي او په دې موسم کې یې حاصل د ښار په نږدې ټولو هټیو کې ليدل کېږي، چې په دغو شنوخونو کې لسګونه کسان په کار بوخت دي.
