ننګرهار کې ۲۴ منځنیو او کوچنیو شیدو پروسس کوونکو ته روزنه او وسایل ورکړل شول
۱۳ وری ۱۴۰۲ه.ش
۱۱ رَمَضانُ المُبارَک ۱۴۴۴ ه.ق
د ننګرهار ولایت د کرنې، اوبولګولو او مالدارۍ ریاست تر چتر لاندې د افغانستان د مالدارۍ د ځنځیروي ارزښت پروژی (AVC-Livestock) له لوري ۲۴ منځنیو او کوچنیو شیدو پروسس کوونکو ته د دوه ورځي روزنې څخه وروسته د لبنیاتو د پروسس وسایل ورکړل شول.
د ننګرهار دکرنې ریاست په استازیتوب د مالدارۍ خدمتونو او څارویو روغتیا امر ډاکتر محمد ضمیر بهسودی په یاد پروګرام کې وویل، چې دغه رونیز پروګرام کې د ننګرهار ولایت له بېلابېلو ولسوالیو څخه ۲۴ تنو د شیدو پروسس کوونکو ګډون کړي وه، چې نوموړو ګډونوالو ته د شيدو د پروسس نوی مهارتونه، له شيدو څخه ډول ډول پنير او نور لبني موادو جوړول، مارکېټ ته د عرضه کولو او حفظ الصحې په برخه کې زده کړې ورکړل شوي دي.
په پای کې ګډونوالو ته د شيدو د پروسس، ذخیره کولو، او کېفيت معلومولو او مارکېټ ته د صحي لبنياتو د اماده کولو په برخه کې اړین وساېل هم وویشل شول.
ددې پروګرام موخه د شیدو د پروسس کوونکو ملاتړ اوترڅنګ یې هېوادوالو ته روغتیايي لبنیات وړاندې کول دي.
