لغمان کې کرونا ځپلو او د طبیعي پېښو له امله زیانمنو بزګرانو سره نغدې مرستې وشوې

۸ غبرګولی ۱۴۰۰
د لغمان دکرنې، اوبولګولو او مالدارۍ ریاست د ملګرو ملتونو د خوړو او کرنې ادارې «FAO» په مالي او د «FGA» موسسې په تخنیکي همکارۍ د یاد ولایت د الینګار، الیشنګ او دولت شاه ولسوالیو درې زره کرونا ځپلو او د طبیعي پېښو له امله په زیانمنو بزګرانو د څه باندې ۱۱ میلیونه افغانیو په ارزښت نغدې مرستې وېشلي دي.
د لغمان دکرنې رییس انجنیر محمدجمیل خوشحال وویل، چې، یاد بزګران د کرونا وبا او طبیعي پېښو له  امله زیانمن شوي ول او له زیاتو اقتصادي ستونزو سره مخ ول، چې هرې کورنۍ ته ۳۸۵۰ افغانۍ ورکړل شوې.
د یادې مرستې په وېش غونډه کې، د لغمان مرستیال والي پوهنوال دوکتور خواجه محمددعصامي د لغمان دکرنې ریاست او همکارو موسسو څخه مننه وکړه، چې  د ټولنې د یو مهم قشر(بزګر) لاسنیوی کوي.
هغه وویل «هیله ده، چې ټولنیز عدالت ته په پام د لغمان له ټولو بزګرانو سره په بېلابېلو برخو کې اسانتیاوې برابرې شي.»
د لغمان دکرنې ریاست د چارواکو په خبره، تېرکال هم له یادو بزګرانو سره د غنمو د اصلاح شویو تخمونو، یوریا او DPAسرو مرستې شوي دي.