د ګوشتې ولسوالۍ ۳۰۰ بزګرانو سره د کرنیزو توکو مرسته وشوه
۲۱ کب ۱۳۹۸
د ننګرهار د کرنې، اوبولګولو او مالدارۍ ریاست د همکارې موسسې « RRAA» په همکارۍ ددې ولایت د ګوشتې ولسوالۍ له ۳۰۰ بزګرانو سره د کرنیزو توکو مرسته وکړه.
د ننګرهار د کرنې ریاست چارواکي وایي، چې په دغو مرسته شویو توکو کې «بېلچې، پنجه کش، رمبې او د کرکېلي اوړند نور توکي» شامل دي.
دغه مرسته شوي توکي د ګوشتې ولسوالۍ پر ۳۰۰ بزګرانو وېشل شوي دي.
د ننګرهار دکرنې، اوبولګولو او مالدارۍ ریاست سرپرست ډاکټر محمد ضمیر بهسودي دیادو مرستو په ترسره کولو خوښي څرګنده کړه او زیاته یې کړه، چې په دې چارو سره به بزګران پر ځان بسیا شي.
په همدې حال کې له دغو مرستو څخه برخمن شوي بزګران د کرنې وزارت له مرستو مننه وکړه او ویې ویل، چې ددغو توکو په ترلاسه کولو سره به د دوی ډېرې ستونزې هوارې شي.
د ننګرهار د کرنې ریاست وایي له دغو توکو څخه برخمن شوي بزګرانو ته د کرکېلي په هکله روزنه هم ورکړل شوې ده.
له یادو مرستو څخه موخه د بېوزلو بزګرانوملاتړ او د بزګرو کورنیو د عوایدو زیاتول دي.
