پکتیکا کې ۲۱۵ مستحقو بزګرانو ته کرنیز توکي ووېشل شول
۲۸ وږی ۱۴۰۵ هـ.ش
۶ رَبِیعُ الْثاني ۱۴۴۸ هـ.ق
د پکتیکا ولایت په مرکز ښرنه کې، د دغه ولایت د کرنې، اوبو لګولو او مالدارۍ ریاست په همغږۍ، د اویک مؤسسې له لوري د «په لویدیځ، سویلي او سوېلختیځ افغانستان کې د اقلیمي انعطاف او اقتصادي ثبات لپاره د زیانمنو ټولنو پیاوړتیا» پروژې په چوکاټ کې، ۲۱۵ مستحقو بزګرانو ته کرنیز توکي ووېشل شول.
د یادو توکو د وېش په بهیر کې د اړوندو مسؤلینو او استازو په حضور کې، هر یوه مستحق بزګر ته د کرنیزو اړتیاوو له مخې ۵۰ کیلوګرامه د غنمو اصلاح شوی تخم، ۵۰ کیلوګرامه توره سره او ۵۰ کیلوګرامه سپینه سره ورکړل شول.
د کرنیزو توکو د وېش پروسه د اړوندو مسؤلینو تر څارنې لاندې په منظم، شفاف او عادلانه ډول ترسره شوه، څو ټاکل شوي توکي پر وخت او په عادلانه توګه مستحقو بزګرانو ته ورسېږي.
د چارواکو په وینا، د دغې پروژې له لارې د بزګرانو د کرنیزو فعالیتونو د پیاوړتیا، د اصلاح شویو تخمونو او کیمیاوي سرو د معیاري کارونې د دودولو، د کرنیزو حاصلاتو د زیاتوالي او د زیانمنو ټولنو د اقتصادي وضعیت د ښه کېدو لپاره زمینه برابرېږي.
د اقلیمي بدلونونو اغېزې، د کرنیزو توکو د بیو لوړوالی او د بزګرانو اقتصادي ستونزې د دې لامل شوي چې د زیانمنو ټولنو د ملاتړ او د کرنیزو فعالیتونو د پیاوړتیا لپاره د مرستندویو بنسټونو له لوري بېلابېل پروګرامونه پلي شي.
