د ننګرهار کوز کونړ کې ۱۲۰ راستنو شوو او بېوزلو کورنیو ته د چرګانو د ساتنې توکي ووېشل شول
د ننګرهار د کرنې، اوبو لګولو او مالدارۍ ریاست په هڅو او د «ستاسو غږ» مؤسسې په مالي او تخنیکي همکارۍ، د دې ولایت په کوز کونړ ولسوالی کې ۱۲۰ راستنو شوو هېوادوالو، معیوبینو او کونډو کورنیو ته د چرګانو د ساتنې اړین توکي ووېشل شول.
د ننګرهار د کرنې، اوبو لګولو او مالدارۍ رییس مولوي عبدالستار محمد د مرستو د وېش پر مهال وویل، چې د دې پروګرام له مخې هرې کورنۍ ته د چرګانو د ساتنې لپاره یو مرغانچه چې یوه دروازه او دوه جالۍ لرونکې کړکۍ لري، درې د اوبو لوښي (اوبه خورې)، درې د دانې لوښي (دانه خورې)، دوه متره جالۍ او ۱۵۰ کیلوګرامه د چرګانو متراکمه دانه ورکړل شوه.
نوموړي زیاته کړه، د دغو مرستو موخه د چرګانو د روزنې له لارې د کورنیو د لومړنیو اړتیاوو پوره کول، د بېوزله کورنیو ملاتړ، د مالدارۍ سکتور پیاوړتیا او په ټوله کې د خوړو خوندیتوب ته زمینه برابرول دي.
د ننګرهار د کرنې رییس همداراز وویل، چې په نږدې راتلونکي کې به د همدې پروګرام په دوام هرې کورنۍ ته ۳۰ دانې چرګان هم ورکړل شي، څو یادې کورنۍ وکولای شي د چرګانو د روزنې له لارې خپل اقتصادي وضعیت ښه کړي.
