د لغمان مهترلام کې د غنمو ننداریزو کروندو څخه د کرنې وزارت د چارواکو لیدنه
۱۲ سلواغه ۱۴۰۴ه.ش
۱۳ شَعبان المُعَظّم ۱۴۴۷ه.ق
د غنمو د ننداریزو کروندو د تطبیق د بهیر د ارزونې په موخه، د کرنې، اوبو لګولو او مالدارۍ وزارت د پلان او پروګرامونو د همغږۍ لوی رییس او د څارنې او ارزونې رییس له خپلې مل پلاوي سره یو ځای د لغمان ولایت د مرکز مهترلام له کلیو څخه لیدنه وکړه.
د دې لیدنې پر مهال، مسؤلینو د ننداریزو کروندو له مستفیدینو سره مرکې ترسره کړې او د پروژې د تطبیق له سیمو څخه یې له نږدې کتنه وکړه. یادې ننداریزې کروندې د اسلامي امارت له بودجې څخه د بزګرانو د تشویق او هڅونې او د نوو کرنیزو طریقو د ترویج په موخه تطبیق شوې دي.
د کرنې وزارت چارواکو ټینګار وکړ، چې د دغو ننداریزو کروندو د سم تطبیق له لارې به دبزګران د غنمو د کرلو او مدیریت له نوو میتودونو سره بلد شي، چې دا به د حاصلاتو د زیاتوالي او د هغوی د عوایدو د ښه والي لامل شي.
همدارنګه د تولید په زیاتېدو سره به د بزګرانو اضافي محصولات کورنیو بازارونو ته وړاندې شي او د سیمې د خلکو لپاره به غنمو ته د ښه لاسرسي زمینه برابره شي، چې په پایله کې به د خوړو امنیت پیاوړی او د کورنیو د معیشتي وضعیت د ښه والي لامل وګرځي.
