دلغمان د کرنې، اوبولګولو او مالدارۍ ریاست لپاره نوی رییس رسماً معرفي شو
۱۲ سلواغه ۱۴۰۴ه.ش
۱۳ شَعبان المُعَظّم ۱۴۴۷ه.ق
د لغمان د کرنې، اوبولګولو او مالدارۍ ریاست نوی رییس، مولوي سلیمان ایمن، د لغمان مرستیال والي الحافظ انځرګل عبدالله له لوري د یاد ریاست کارمندانو ته ور وپېژندل شو.
د پېژندنې په یاده غونډه کې، د لغمان مرستیال والي سربېره، د ننګرهار ولایت د کرنې رییس مولوي عبدالستار محمد، د نورستان د کرنې رییس مولوي محمدولي محسن، د ریاست کارمندانو او د ولایت د بېلابېلو ادارو مسؤلینو ګډون کړی و.
په غونډه کې د لغمان د کرنې پخواني رییس، چې اوس د ننګرهار د کرنې ریاست د رییس په توګه ګمارل شوی دی وینا وکړه او ویې ویل، چې بدلون او تبدیل د یو دولت له اصولو څخه دی. نوموړي د لغمان د کرنې ریاست د کارمندانو له ښې همکارۍ څخه مننه وکړه او نوي رییس ته یې په دغه ولایت کې د بریالي خدمت کولو دعا وکړه.
ورپسې د لغمان د کرنې نوي ټاکل شوي رییس، مولوي سلیمان ایمن، وویل، چې دنده یو دروند مسؤلیت دی او هڅه به کوي چې دغه مسؤلیت په ښه ډول ادا کړي. هغه زیاته کړه: «موږ د ولس خدمتګاران یو او خلکو ته به شفاف خدمات وړاندې کوو.» نوموړي د پخواني رییس کړنې هم وستایلې.
همدارنګه د لغمان مرستیال والي الحافظ انځرګل عبدالله د پخواني رییس د خدمتونو ستاینه وکړه، نوي رییس ته یې د ښه خدمت کولو توفیق وغوښت، او د ولایتي ادارې په استازولۍ یې د بشپړې همکارۍ ډاډ ورکړ.
