د کرنې وزارت د پلان لوی رییس د لغمان ولایت د «ختیځ ځلاند» شرکت څخه لیدنه وکړه
۱۱ سلواغه ۱۴۰۴ه.ش
۱۲ شَعبان المُعَظّم ۱۴۴۷ه.ق
د کرنې، اوبو لګولو او مالدارۍ وزارت د پلان او د پروګرامونو د همغږۍ لوی رییس مولوي عبدالغفور د خپل مل پلاوي سره یوځای د لغمان ولایت د «ختیځ ځلاند» شرکت څخه لیدنه وکړه.
حاجي اسدالله، چې د یاد شرکت مالک دی، د لغمان ولایت د مرکز مهترلام دښتې په سیمه کې ۵۰۰ جریبه ځمکه لري، چې له دې جملې څخه ۴۹۵ جریبه یې کرنې ته او ۵ جریبه یې مالدارۍ ته ځانګړې شوې ده. د لیدنې او ورسره د خبرو اترو پر مهال څرګنده شوه چې دا مهال شاوخوا ۵۰ سلنه د نوموړي تر واک لاندې ځمکې فعالې دي او د کارګرو لپاره یې د کار مناسب فرصتونه برابر کړي دي.
د دغو ځمکو اساسي ستونزه د اوبو کموالی بلل کېږي او هیله ده، چې د شاهي کانال د چارو په چټکتیا سره، چې د علینګار ولسوالی څخه سرچینه اخلي، ټولې یادې ځمکې تر اوبو لګولو لاندې راشي. د دې پروژې بشپړ پلي کېدل به، د کورنیو تولیداتو د زیاتوالي تر څنګ، د کار نوې زمینې هم برابرې کړي او په کورنیو بازارونو کې به د کرنیزو محصولاتو د پلور بهیر پیاوړی کړي.
