د ننګرهار وادې کرنیز شرکت د هډې فارم د اوبو دویم واټرپمپ د کاسې پاکونه او ترمیمي چارې د بشپړېدو په درشل کې

۲۴ مرغومې ۱۴۰۴ه‍.ش
۲۴ رَجَب المُرَجَّب ۱۴۴۷ه‍.ق
د ننګرهار وادې کرنیز شرکت د هډې فارم د اوبو دویم واټرپمپ د هغې مهمې او ارزښتناکې پروژې له ډلې څخه دی، چې د اوبو او لمریزې برېښنا په وسیله د نږدې لس زره جریبه کرنیزې ځمکې د خړوبولو لپاره اوبه برابروي. د همدې اوبو په مټ د ننګرهار وادي کرنیز امارتي شرکت د زیتون او ستروس بڼونه، د هډې فارم کرنیزې ځمکې او همدارنګه د دې فارم د شاوخوا سیمو د اوسېدونکو ځمکې خړوبېږي.
د یاد واټرپمپ د اوبو کاسې چې شاوخوا یو کال پکې د پاکونې چارې نه وې ترسره شوې، د خځلو، ناپاکیو، خشاکو او رسوبي موادو څخه ډکه شوې وه. اوس د اړتیا له مخې د دغې کاسې د پاکونې چارې پیل شوې او تر ډېره بریده بشپړې شوې دي. د یادونې وړ ده، چې د اوبو د کاسې د رسوبي موادو پاکونه د اړتیا په صورت کې په کال کې یو ځل ترسره کېږي.
د دې کاسې د پاکونې، ترمیم او اړوندو نورو چارو عملي کول د ننګرهار وادي کرنیز امارتي شرکت د کرنیزو او تخنیکي چارو ریاست اړوند د اوبو لګونې تخنیکي ساتنې او څارنې امریت د امر، د دغه امریت د مدیرانو، فني او مسلکي کارګرو، شته وسایطو او د سیمې د یو شمېر اوسېدونکو په همکارۍ ترسره شوي دي.
د یادې پاکونې اصلي موخه دا ده، چې واټرپمپونو ته په منظم ډول د اوبو رسول او پورته کول یقیني شي، تر څو اړوندو کرنیزو ساحو ته اوبه پر وخت ورسېږي.
د معلوماتو له مخې، په دې سیمه کې ټولټال څلور  پايي د اوبو برېښنا واټرپمپونه شتون لري، چې دوه پايي یې روسي او دوه پايي یې چینایي دي، او همدارنګه دوه پايي د لمریزې برېښنا واټرپمپونه هم فعال دي.
د کاسې د پاکونې، د واټرپمپونو ترمیم او د دروازو د ترمیم پر چارو شاوخوا ۱۰۰ زره افغانۍ لګښت اټکل شوی، چې ټاکل شوې د راتلونکو دوو اوونیو په ترڅ کې یې چارې په بشپړه توګه بشپړې شي.