لغمان کې له ۳۰ بېوزلو کورنیو سره د شېدو غواګانو مرسته وشوه
د لغمان د کرنې، اوبو لګولو او مالدارۍ ریاست تر چتر لاندې دملګرو ملتونو د خوړو او کرنې ادارې «اف.اې.او» په مالي ملاتړ او د «اې.بۍ.ام» مؤسسې په تخنیکي همکارۍ، د لغمان ولایت د الیشنګ ولسوالی له ۳۰ کونډو او بېوزلو مېرمنو سره د شېدو غواګانو مرسته وشوه.
د یادې مرستې د وېش مراسم د لغمان د کرنې، اوبو لګولو او مالدارۍ ریاست د رییس مولوي عبدالستار محمد په لارښوونه، د الیشنګ ولسوالی د ولسوال قاري عبدالقاهر متوکل، د کرنې ریاست دمالدارۍ او څارویو دروغتیا آمر ډاکټرجوادالله علیزاده او اقتصاد ریاست استازي او د مؤسسې د مسؤلینو په حضور کې ترسره شول.
په دې مرسته کې، د شېدو غواګانو تر څنګ هرې مستحقې کورنۍ ته سل ۱۰۰ کیلوګرامه کنجاړه او د شېدو د راټولولو، ساتنې او حفظالصحې اړوند توکي هم ورکړل شول.
د دې مرستې اساسي موخه د کورني اقتصاد پیاوړتیا، د لبنیاتو تولید زیاتوالی او د مالدارۍ سکتور ته وده ورکول دي.
د لغمان د کرنې، اوبو لګولو او مالدارۍ ریاست هڅه کوي، چې په کلیوالي سیمو کې د خلکو د اقتصادي پیاوړتیا په موخه دا ډول ګټورې او دوامدارې پروژې پلې کړي.
