د هلمند نوزاد کې کروندګرو ته د اصلاح شويو غنمو او سرې د وېش بهیر پیل شو

۲۹ لیندۍ ۱۴۰۴ هـ.ش
۲۹ جُمَادَى الثاني ۱۴۴۷ هـ.ق
د هلمند ولايت د کرنې، اوبولګولو او مالدارۍ ریاست لخوا، د نوزاد ولسوالی د کرنيزو خدمتونو مديريت تر چتر لاندې، په دې ولسوالی کې د سروې له بشپړېدو وروسته، پر یوشمېر بزګرانو د اصلاح شويو غنمو او کيمياوي سرو د وېش لړۍ پيل شوه.
په دې پړاو کې ټاکل شويو زرو کروندګرو ته هر يو ته ۵۰ کيلوګرامه اصلاح شوي د غنمو تخم، ۵۰ کيلوګرامه تور کود او ۵۰ کيلوګرامه سپين سره ووېشل شول.
د وېش پر مهال د نوزاد ولسوالی د ترويج کارکوونکو کروندګرو ته سپارښتنه وکړه، چې اصلاح شوي تخمونه دې د ترويج په موخه په خپلو کروندو کې وکري، تر څو د ښه حاصل له لارې نور کروندګر هم ترې ګټه واخلي.
همداراز، د افغانستان د راتلونکو نسلونو  مؤسسې مسؤولينو وويل، چې د اصلاح شويو تخمونو او سرو سم استعمال به د حاصلاتو د زياتوالي لامل شي او د کروندګرو پر اقتصادي ژوند به مثبت اغېز ولري.
په ياده پروسه کې د ولسوالۍ مقام، امنيه قومندانۍ، استخباراتو مديريت او د ترويج کارکوونکو ګډون درلود، او کروندګرو ته د اصلاح شويو تخمونو او سرو د سم استعمال په اړه عملي روزنه هم ورکړل شوه.
کروندګرو د خوښۍ څرګندونه وکړه او ويې ويل؛ که مرستندويه ادارې د اړوندو دولتي بنسټونو تر چتر لاندې پر وخت مرستې ورسوي، نو د دوی په حاصلاتو کې به د پام وړ بهبود رامنځته شي.