د غزني د کرنې ریاست او د سرحدونو او قبایلو ریاست د اصلاح شویو تخمونو د عادلانه وېش په پار ګډه ناسته وکړه
۲۰ لیندۍ ۱۴۰۴ هـ.ش
۲۰ جُمَادَى الثاني ۱۴۴۷ هـ.ق
د غزني د کرنې، اوبولګولو او مالدارۍ رییسس مولوي محمد اسماعیل شکیب او ددې ولایت د سرحدونو، اقوامو او قبایلو رییس جان محمد حاجي مومین ګډه ناسته وکړه، چې پکې د اصلاح شویو تخمونو د عادلانه وېش، قومي توازن، او د ملي یووالي د پیاوړتیا پر همغږۍ خبرې وشوې.
یاده ناسته د کرنیزو تخمونو د وېش بهیر ښه تنظیم، اقوامو ته د فرصتونو رامنځته کولو او د ملي یووالي د لا پیاوړتیا په موخه ترسره شوه. په دې لیدنه کې دواړو خواوو ټینګار وکړ چې اصلاح شوي تخمونه باید د شفافې او همغږې پروسې له لارې ټولو اړمنو سیمو او قومونو ته په مساوي ډول ورسېږي.
د غزني کرنې رییس مولوي محمد اسماعیل شکیب وویل، چې د تخمونو وېش به یوازې هغو بزګرانو ته کېږي، چې مستحق وي او دا بهیر به د قومي توازن د دقیقو معلوماتو او د سیمې د مشرانو په همکارۍ پر مخ وړل کېږي.
په پای کې ګډونوالو وویل، چې دا ډول همغږي نه یوازې د کرنې سکټور د پیاوړي کېدو لامل کېږي، بلکې د اقوامو تر منځ اعتماد، یووالی او ګډ کار ته هم نوی روح بښي.
