د غزني دکرنې رییس د آب بند ولسوالی له ولسوال او قومي مخورو سره وکتل
۲۴ وری ۱۴۰۴ ه.ش
۱۵ شَوّالُ المُکَرَّم ۱۴۴۶ه.ق
د غزني دکرنې، اوبولګولو او مالدارۍ رییس مولوی محمد سماعیل شکیب، ددې ولایت د آب بند ولسوالی له ولسوال او قومي مخورو سره په کتنه کې د یادې ولسوالی د کرنې او مالدارۍ پر شته ستونزو، ننګونو او فرصتونو خبرې اترې وکړې.
ددې لیدنې په ترڅ کې د آب بند ولسوالی ولسوال او مخورو د کرنې او مالدارۍ په برخه کې خپلې ستونزې او ننګونې شریکې کړې او په یادو برخو کې د پروژو پلي کولو او همکارۍ غوښتنه وکړه.
د آب بند ولسوال وویل، چې د غزني آب بند ولسوالی په تېرو څو لسیزو کې جنګونه او وچکالۍ ځپلي، چې اوسمهال بیارغونې او پروژو پلي کولو ته ډېره اړتیا لري.نوموړې د شنوخونو، اصلاح شوي تخمونو، بڼوالۍ، د ځمکې اجاره او د مالدارۍ په مختلفو برخو کې د همکارۍ غوښتنه وکړه.
په همدې حال کې د غزني دکرنې رییس د آب بند ولسوالی ولسوال او مخورو ته د کرنیزو او مالدارۍ پروژو د تطبیق په برخه کې د همکارۍ ډاډ ورکړ.
