خوست ولایت کې د خوسا شوو بانجانو او بنډیو د واردولو مخه ونیول شوه
۲۴ وری ۱۴۰۴ ه.ش
۱۵ شَوّالُ المُکَرَّم ۱۴۴۶ه.ق
د خوست ولایت د کرنې، اوبو لګولو او مالدارۍ ریاست د غلام خان بندر نباتي کرنتین مدیریت کارکوونکو درې ټېلره رومي بانجان او بندۍ چې له پاکستان څخه افغانستان ته واردېدل، معاینه کړل.
د یادو توکو له ارزونې او معاینې وروسته په ډاګه شوه، چې په دغو توکو کې ډېر بانجان او بنډۍ خوسا شوي دي. له همدې امله، یاد خراب بانجان او بنډۍ له سالمو جلا او په یوه مناسب ځای کې تر خاورو لاندې شول، ترڅو د روغتیايي ستونزو مخنیوی وشي.
پاتې روغو او باکیفیته بانجان او بنډۍ ته د واردولو اجازه ورکړل شوه. د خوست د کرنې ریاست له ټولو سوداګرو غوښتنه کوي، چې باکیفیته محصولات وارد کړي، ترڅو هېوادوال له صحي او معیاري خوراکي توکو څخه استفاده وکړي.
