لوګر کې د چرګانو فارمونو له لارې؛ په کلني ډول شاوخوا ۸۰۰ ټنه غوښه بازار ته وړاندې کېږي

د لوګر د کرنې، اوبولګولو او مالدارۍ ریاست چارواکي وایي، چې د دې ولایت د چرګانو له شته ٧٠ فارمونو څخه، په کلنۍ ډول شاوخوا ٨٠٠ ټنه غوښه ترلاسه او بازار ته وړاندې کېږي.
د لوګر دکرنې ریاست د عواید د تنظیم آمر، قاري عبدالبصیر شاهد وویل؛ چې اوس مهال د لوګر په کچه د چرګانو د روزنې او غوښې د تولید برخه کې، له ٧٠٠ دانې څخه نیولي تر ٩٠٠٠ دانې په ظرفیت، د غوښینو چرګانو ٧٠ فارمونه شتون لري، چې هر کال د یادو فارمونو له لارې شاوخوا ٨٠٠ سوه ټنه د چرګ غوښه تولید او بازار ته وړاندې کېږي.
دغه راز نوموړي زیاته کړه؛ چې د یادو فارمونو تولید شوي غوښې او چرګان د لوګر سربېره ګاونډو ولایتونو ته هم صادرېږي.
د لوګر دکرنې ریاست د چارواکو په وینا؛ د چرګانو د روزنې او هګیو د تولید په موخه، سږ کال سلکونو بېوزلو کورنیو باندې د هګیو چرګانو واړه فارمونه هم وېشل شوي، چې هر فارم په اوسط ډول، هره ورځ له شلو څخه زیاتو هګیو د تولید او بازار ته د عرضه کولو ظرفیت لري.