پکتیکا کې د څارویو د واکسین کمپاین پیل شو
په پکتیکا ولایت کې د مرکز په شمول په ټولو ۲۴ ولسوالیو کې د څارویو لپاره د خطرناکو ساري ناروغیو مخنیوي په موخه واکسین کمپاین نن ورځ رسماً پیل شو.
په دې کمپاین کې به د وړو شخوند وهونکو څارویو طاعون لپاره ۸زره ډوزه ، د لمپي سکین لپاره ۱۵زره ډوزه او د طبق لپاره ۸زره ډوزه واکسین تطبیق شي. یاد کمپاین د کرنې ریاست د محترم رییس مولوي محمدزمان عمري په لارښوونه، د خوراک او کرنې نړیوال پروګرام ایف اې او په مالي ملاتړ او د څارویو روغتیا او مالدارۍ امریت په تخنیکي همکارۍ ترسره کېږي.
د دې پروګرام اصلي موخه په هېواد کې د ساري ناروغیو مخنیوی او د مالدارۍ سکتور ته وده ورکول دي، ترڅو د څارویو روغتیا خوندي او د مال لرونکو عواید لوړ شي.
په افغانستان کې د څارویو د ساري ناروغیو خپرېدل د مالدارۍ سکتور ته لوی زیان اړوي. د دې ډول کمپاینونو په ترڅ کې هڅه کېږي چې نه یوازې ناروغۍ کنټرول شي، بلکې د خلکو اقتصادي حالت ته هم وده ورکړل شي.
