د کندهار دامان کې نږدې ۸۰۰ کډوالو کورنیو لپاره ښارګوټی جوړېږي

۲۱ لړم ۱۴۰۳ه‍.ش
۹ جُمَادَى الأول ۱۴۴۶ه‍.ق
د کندهار دامان ولسوالی کې د ۷۹۱ کډوالو کورنیو لپاره د یو ښارګوټی جوړلو د پروژې پرانسته ترسره شوه. دغه ښارګوټی د عالیقدر امیرالمؤمنین شیخ صاحب حفظه الله تعالی د حکم پر اساس د افغانستان اسلامي امارت په شخصي بودیجه، د کندهار د کرنې، اوبو لګولو او مالدارۍ او د کور او ښار جوړونې ریاستونو او یو خصوصي شرکت په ګډه همکارۍ د (۱۲،۵) میلیونه افغانیو په ارزښت جوړېږي.
ددې پروژې په پرانیست غونډه کې د کندهار دکرنې، اوبو لګولو او مالدارۍ رییس، الحاج مولوی فضل الباري فضلي وویل: «د اسلامي امارت په بیا واکمنۍ سره هڅه شوې، چې د هېوادوالو لپاره ښوونه، روزنه، کار او پرمختګونه رامنځته شي.» هغه زیاته کړه، چې د دې ښارګوټي جوړېدو سره به کډوالو کورنیو ته د کار، زده کړې او نورو اسانتیاوو لپاره زمینه برابره شي.
د کور او ښار جوړونې ریاست د انجنیري څانګې آمر، احسان الله وویل، چې یاد ښارګوټی به د دامان ولسوالی په شهرک سیمه کې پر ۸۶۰ جریبه ځمکه په ۴۵ ورځو کې جوړ شي. هغه همداراز وویل، چې په یاد ښارګوټي کې به ۷۹۱ کورنۍ استوګنه کوي، چې پکې ۴ مجوماتونه، یوه لویه مرکزي عیدګاه، ۴ پارکونه، د والیبال او کرکیټ یو یو لوبغالی او ښوونځی او مدرسه هم جوړ شي.
د پرانستغونډې په پای کې د یاد ښارګوټي د بنسټ ډبره کېښودل شوه او غونډه د اختتامیې په دعا سره پای ته ورسېده.