پکتیا کې د واټرشیډونو او چکډېمونو رغنیزې چارې پیل شوې

۱۹ لړم ۱۴۰۳ه‍.ش
۷ جُمَادَى الأول ۱۴۴۶ه‍.ق
د پکتیا د کرنې، اوبولګولو او مالدارۍ ریاست اړوند د خوړو د خوندیتوب بیړنۍ پروژې له لورې ددې ولایت د مرکز په ګډون په څلورو ولسوالیو (زرمت، ځاځي اریوب او روحاني بابا ) کې د واټرشیډونو او چکډېمونو رغنیزې چارې پیل شوې.
د همکارې مؤسسې د مسؤلینو په وینا د نوموړې پروژو په تطبیق سره به د سیمې  ۱۲۰۰ کسانو ته د ۴۰ ورځو لپاره کاري فرصتونه برابر شي، د یادونې وړ ده چې سږ کال به د افغانستان لپاره د ناروې کميټې لخوا په یادو څلورو ولسوالیو کې د باراني اوبو د زېرمې او سېلابونو د مخنیوي په پار  ۹۶۰۰۰  ترنچونه ( کوچنۍ کندې) او ۱۳ چکډمونه هم جوړ شي.
د کرنې ریاست په استازیتوب مولوي علاؤالدين د افغانستان لپاره د ناروې کمیټې دفتر له مسؤلینو مننه وکړه او د پلي کېدو په برخه کې یې د هر راز همکارۍ ډاډ  ورکړ، او ویې ویل چې دا ډول پروژې د ځمکې لاندې اوبو د تغذیې او سېلابونو په کنترول کې مهم رول لوبوي، همدارنګه ده زیاته کړه چې د پروژې د ښه او پر وخت پلي کېدو لپاره باید د همکارې مؤسسې کارمندان او د سیمې اوسیدونکي پوره هڅه وکړي.
له یادو پروژو څخه به په سلګونو کورنۍ ګټه واخلی او ترپوښښ لاندی به یې راولي، همدارنګه دغه پروژی به د کرنې، اوبو لګولو او مالدارۍ ریاست، د ولسوالی اړونده کلیو د پرمختیایي شورا او طبیعی سرچینو د مدیریت ټولنې سره په پوره همغږې تطبیق شي.