د کندهار دامان ولسوالۍ کې د څارویو لپاره د چیچک او طاعون وقایوي واکسین کمپاین پیل شو
په کندهار ولایت کې د کرنې، اوبو لګولو او مالدارۍ ریاست په همغږۍ د اروپایي ټولنې په مالي ملاتړ او افغانستان لپاره د هالینډ کمېټې په تطبیق او تخنیکي همکارۍ، د دامان ولسوالۍ په کچه د چیچک او طاعون ناروغیو د مخنیوي په موخه د څارویو وقایوي واکسین کمپاین پیل شو.
د دې کمپاین موخه د چیچک او طاعون ناروغیو مخنیوی دی، چې له امله یې ۹۴۰۰ کوچني څاروي واکسین کېږي. په دې توګه، هڅه کېږي چې د څارویو د ناروغیو خپرېدو مخه ونیول شي او د راتلونکو وباو څخه خوندي شي.
د چیچک او طاعون ناروغۍ د څارویو د مړینې سبب ګرځي او د مالدارانو اقتصاد ته جدي زیان اړوي. نو، د واکسین کمپاین په ځانګړې توګه د دې ناروغیو د مخنیوي لپاره ترتیب شوی، ترڅو د مالدارانو د اقتصادي زیانونو مخنیوی وشي.
ځایي اوسېدونکي د دې کمپاین له امله خوښ دي او د کرنې ریاست او هالنډ کمېټې څخه مننه کوي چې د دوی د څارویو ساتنې لپاره هڅې کوي.
یاد کمپاین د کندهار په بېلابېلو ولسوالیو کې یوه میاشت وړاندې پیل شوی و، چې د ۸۲ زره ډوزه واکسین د تطبیق چارې پکې شاملې وې.
