ننګرهارکې یوشمېر مالدارانو سره د لبني بستو مرسته وشوه
۲۸ تله ۱۳۹۸
د ننګرهار د کرنې، اوبولګولو او مالدارۍ ریاست چارواکي وایي، چې ددې ولایت د کامې ولسوالۍ د زاخېلو کلي د کورنیو د اقتصادي پیاوړتیا په پار پر ۸۰ کوچنیو مالدارانو د لبني توکو کڅوړې ووېشل شول.
د ننګرهار د کرنې، اوبولګولو او مالدارۍ ریس انجنیر سمیع الله نصرت وایي دغه مرسته چې ټولیز لګښت یې ۱۱۰۰ زره افغانۍ ده، د کرنې وزارت د اقليمي بدلونونو له کبله د رامنځته کېدنکو ګواښونو د کمولو پروژې « CDRRP» له خوا د بېوزله کورنیو د اقتصادي پیاوړتیا په موخه تر سره شوي دي.
ښاغلی نصرت وویل، چې د زاخېلو په سیمه کې د شیدو ټولولو یو مرکز تجهیز او ګټې اخیستنې ته سپارلی، چې په لړ کې یې دغه مرسته هم ترسره شوه.
د ننګرهار د کرنې رییس وویل، چې د ياد مرکز له فعالېدو او ددغو توکو له مرستو یې موخه د کوچنيو مالدارانو لپاره د شيدو د خرڅلاو زمينه برابرول او له دې لارې د هغوی مالدارۍ ته پراختیا ورکول دي.
باید وویل شي، چې دغه مرکز لپاره د زاخېلو شورا د غړو له خوا یوه ودانۍ هم ځانګړی شوی دی، چې د شېدو راټولولو، زېرمه او لېږد چارې په کې پرمخ وړل کیږي.
د دغو مرکزونو جوړول د لبنیاتو د پراختیا او کاروبار په برخه کې یو مثبت ګام دی. د شیدې ټولول او شیدې ته بازارموندنه کولای شي، چې د مالدارانو اقتصاد ته وده ورکړي.
