جلال آباد ښار کې یوشمېر حیواني او نباتي درملتونونه وڅارل شول

۲ تله ۱۴۰۲ه‍.ش
۹ ربیع‌الاول ۱۴۴۵ه‍.ق 
د کرنې، اوبولګولو او مالدارۍ وزارت  د بوټو ساتنې او قرنطین رییس انجینر عتیق الله مسلم، د ننګرهار د کرنې رییس مولوی عبدالستار محمد، د  تخمونو دتصدیق رییس او د وزارت مقام سلاکار  ددې ولایت مرکز جلال آباد ښار  یوشمېر حیواني او نباتي درملتونونه وڅارل.
دغه څارنه مالدارانو ته د معیاري چوپړونو د وړاندې کولو په پار ترسره شوي دي.
د بوټو ساتنې او قرنطین رییس انجینر عتیق الله مسلم وویل، چې په دې څارنه کې هټیوالو ته نسخې پرته درملو پلورلو،  د بزګرانو د لاپوهاوي په موخه لیبل په ملي ژبو لیکلو، کرنې وزارت ددرملو او کیمیاوي سرو مجاز لیست او کړنلاري مطابق درملو واردولو،  حیواني او نباتي درملتونونو څارنه، د بې کیفیته او تاریخ تېرو درملو تشخیص، د درملتونونو او وترنریو پاکوالۍ او د کرنې وزارت د قوانینو پر اساس د درملتونونو جوازونو څارل شامل دي.
د دغه کنټرول څخه موخه داده چې د بې کيفيته او تاريخ تېرو  درملو  پلور مخه ونیول شي، مالدار ته نسخې ورکولو،  په خپل سر د هټيو پرانستل او د غير قانونې درمل مخنيوي وشي.
دغه راز ددې څارنې په ترڅ کې یو اندازه تاریخ تېري درمل هم  راټول شول.
دغه راز  په پايله کې يو شمېر هغه هټۍ چې د فعاليت جواز وخت يې تېر و او یایې جوازونه نه درلودل  سپارښتنه ور ته وشوه، چې خپل  جوازونه واخلي او یایي  نوي کړي او هغه درمل پلورنځي چې غیر مسلکي کسانو پکې کار کاوه ورته لازمې سپارښتنې وشوې.
 همدارنګه  سپارښتنې ورته وشوې چې په راتلوونکې کې د غير معياري هټيو د پرانستلو، د غیر مسلکي کسانو ګمارنې، د بې کيفيته درملو او واکسینو د پلور او واردولو څخه په کلکه ډډه وکړي.
دغه څارنې او ارزونې ددې لامل کېږي چې، درملتونونه او د وترنرۍ د برخې فعالین خپلو مشتریانو ته معیاري او په ښه کیفیت برابر چوپړتیاوې وړاندې کړي.