د لوګر مرستیال والي د کرنې، اوبولګولو او مالدارۍ وزارت له پلاوي سره وکتل
٢۹ وږي ۱۴۰۲ه.ش
۵ ربیعالاول ۱۴۴۵ه.ق
د لوګر مرستیال والي الحاج مولوي عنایتالله شجاع د کرنې، اوبولګولو او مالدارۍ وزارت له راغلي پلاوي سره په داسې حال کې چې د ولایت مقام د دفتر رییس مولوي میرویس وحیدالله او د لوګر د کرنې ریاست د عوایدو آمر قاري شاهد همراز هم حضور درلود وکتل.
د کرنې وزارت څخه راغلي پلاوي دغه ولایت ته د خپل سفر په اړه معلومات ورکړل او د ولایت مقام څخه یې د همکارۍ غوښتنه وکړه.
یاد پلاوی وویل، چې دوی غواړي د لوګر ولایت مرکز پلعلم په ګډون په ټولو ولسوالیو کې جیوډیزیکي شبکې جوړې او د کرنې، اوبو لګولو او مالدارۍ ریاست په واک یې ورکړي، چې د یادو جیوډیزیکي شبکو په موجودیت کې به په راتلوونکي کې ټولې ساختماني پروژې لکه سړک، د سړک اړوند پلونه او د نورو سوداګریز او استوګنیز ساختمانونو په معیاري جوړولو کې به ترې ګټه پورته شي.
د لوګر مرستیال والي الحاج مولوي عنایتالله شجاع دوی ته ډاډ ورکړ، چې له دوی سره به پوره همکاري کوي.
د لوګر مرستیال والي له دوی سره ژمنه وکړه، چې ولسوالیو ته به د سفر پر مهال له ولسوالانو سره په همغږۍ دوی ته د فعالیت ښه زمینه برابره کړي.
لوګر ولایت ته د دغه پلاوي د سفر موخه د لوګر د مرکز او ولسوالیو د نقشو بیارغونه او عصري کول دي او په دې کار سره به دولتي ځمکې او جایدادونه لا ښه تثبیت شي.
