د پکتیا په سیدکرم کې د ټولنې په کچه د ځمکې او ځنګلونو د تلپاتې مدیریت پېژند غونډه
۲۹ زمری ۱۳۹۸
د کرنې، اوبولګولو او مالدارۍ وزارت د ملګرو ملتونو د خوړو او کرنې سازمان « FAO» په همکارۍ د پکتیا ولایت په احمد اباد او سیدکرم ولسوالیو کې د ټولنې په کچه د ځمکې او ځنګلونو د تلپاتې مدیریت پروژه پلي کوي. په هغه غونډه کې، چې د یادې پروژې د پېژندنې په موخه د پکتیا ولایت په سیدکرم ولسوالۍ کې په لاره اچول شوې وه د پکتیا ولایت د طبیعي ځنګلونو عمومي مدیر مجاهد شګیوال، د یادې پروژې ولایتي مسوول محمد ابراهیم قادري، د سید کرم ولسوال ظاهر شاه زهیر او یوشمېر قومي مشرانو او ځوانانو ګډون درلود.
یاده پروژه د ملګرو ملتونو د خوړو او کرنې سازمان « FAO» په همکارۍ د کرنې، ابولګولو او مالدارۍ وزارت تر چتر لاندې د پکتیا ولایت په احمداباد او سیدکرم ولسوالیو کې پلي کيږي. ددې پروژې د پلي کېدو موخه د ځنګلي قوریو جوړول، د ځنګلونو، واټر شیډونو او ټراسونو بیارغول او د ځنګلوالۍ ټولنې جوړول دي.
