میدان وردګو ولایت کې ۲۰۰ بڼوالو سره د اړینو توکو مرسته وشوه
۳۱ غبرګولی ۱۴۰۲ه.ش
۳ ذیالحِجّة ۱۴۴۴ ه.ق
د میدان وردګو ولایت دکرنې، اوبولګولو او مالدارۍ ریاست د خوړو نړویال پروګرام «WFP» په مالي او د افغانستان لپاره د سویډن کمېټې په تخنیکي همکارۍ ددې ولایت د جلریز او نرځ ولسوالۍ پر ۲۰۰ بڼوالو د بڼوالۍ اړونده توکي وېشلي دي.
د میدان وردګو ولایت دکرنې ریاست وایي، چې د افغانستان لپاره د سویډن کمېټې له خوا پر یادو بڼوالو د بڼوالۍ اړونده توکي، چې په کې د ښاخ برۍ قیچي، اره او ترڅنګ یې د محصول ټولولو خریطې او سبدونه شامل دي وېشل شوي دي.
د چارواکو په خبره یاد بڼوال د مسلکي چارو د پرمخ وړولو په پار روزنه هم ورکړل شوي دي.
د میدان وردګو ولایت دکرنې ریاست هلې ځلې کوي، چې په دې ولایت د بزګرانو او بڼوالو اقتصادي ودې ته زمینه برابره او ارزښت لرونکي پروژې پلي کړي.
