ننګرهار کې ۳۰ تنه کب روزونکي وروزل شول

۱۷ غویی ۱۴۰۲ه‍.ش
۱۷ شَوّال المُکَرَّم ۱۴۴۴ ه‍.ق
د ننګرهار د کرنې، اوبولګولو او مالدارۍ ریاست په هڅو د مالدارۍ ځنځیري ارزښت ته د ودې ورکولو پروژې (AVCL) له لوري د دې ولایت ۳۰ تنه د کبانو فارم لرونکو ته د کبانو روزنې، د فارم ښه مدیریت او د کبانو د تغذیي برخه کې روزنه ورکړل شوي دي. 
د ننګرهارد مالدارۍ خدمتونو او څارویو روغتیا امریت چارواکي وايي، چې د بټي کوټ، غني خېل، رودات، ګوشتې، مهمند درې، بهسود او کوز کونړ ولسوالیو ۳۰ تنه د کبانو فارم لرونکو ته دوه ورځنې روزنیز پروګرام کې عملي او نظري زده کړې ورکړل شوي، چې د پروګرام په پای کې هر يو فارم لرونکي ته د کبانو د نيولو جال او د وښو د مېده کولو ماشين هم ورکړل شوی دی.
ددې پروګرام موخه د کب روزونکو وړتیاوې لوړول او په دې ولایت کې د کب روزنې صنعت ته پراختیا ورکول دي.