د لغمان د کرنې رییس قرغیو ولسوالی ته د سفر په ترڅ کې د مالدارۍ فارمونو څخه لیدنه وکړه
١٤ غویی ۱۴۰۲ه.ش
١٤ شَوّال المُکَرَّم ۱۴۴۴ ه.ق
دلغمان کرنې، اوبولګولو اومالدارۍ رییس الحاج مولوي محمدولي محسن قرغیو ولسوالی ته په داسې حال کې سفر وکړ چې دیاد ریاست دمالدارۍ چارو امر جواد علیزاده او د کرنیزو چارو امر انجنیر بریالی همدرد هم ورسره وو.
نوموړو چارواکو د یادې ولسوالی اړوند دره لام او د چهار باغ سیمو د اصلاح شویو نسلونو غواګانو او د ماهیانو تولیدي فارمونو څخه لیدنه وکړه.
ښاغلي محسن د مالدارۍ او دکبانو تولیدي فارمونو مالکانو ته د دوی دکارو بار دلا پرمختګ لپاره لازمې مشورې ورکړل او د دوی ستونزې له نږدې واوریدې او دحل ډاډ یې ورکړ.
بلخوا دیادو سیمو فارمدارنو د لغمان د کرنې رییس څخه مننه وکړه، چې د دوی ستونزو ته تل وخت په وخت رسېدنه کوي. نوموړي فارمداران له خپلو تولیداتو څخه راضي وو او دلغمان د کرنې، اوبولګولواومالدارۍ ریاست څخه یې د حیواني خوراکې او همداراز دشیدو لوشلو او د لبنیاتو د پروسس کولو ماشینونو په برخه کې د مرستې غوښتنه وکړه، چې په دې برخه کې محسن دوی ته ډاډ ورکړ ويې ویل هغه امکانات او خدمات چې د کرنې ریاست په واک کې دي هغه به ټولو فارمدارنو ته پروخت رسېږي، هغه زیاته کړه چې لا به هڅه کوي چې ترڅو د مؤسساتو له لارې دفارمدارنو یادې غوښتنې پوره کړي.
دیادولو وړ ده، چې په قرغیو ولسوالی کې ١٢٠ بابه د اصلاح شویو نسلونو غواګانو فارمونه او ٨٠ بابه د کبانو فارمونه او ٤٢ بابه د غوښینو چرګانو فارمونه شتون لري، چې په سلګونوکسانو ته په کې په مستقیم او غیرمستقیم ډول د کار زمینه برابره شوې ده.
