ننګرهار کې یو نیالګی دځان اوبل دافغانستان لپاره ترعنوان لاندې دنیالګیو کېنولو کمپاین پیل شو
د ننګرهارد کرنې، اوبولګولو اومالدارۍ ریاست له لورې دنیالګیو کېنولو پسرلنۍ کمپاین د ننګرهار د عید ګاه جومات ته څېرمه د اطلاعات او فرهنګ ریاست اړوند کتابتون په ودانۍ کې د پټې په پرې کولو او نیالګیو په کېنولو سره پیل شو.
دنیالګیو کينولو کمپاین پرانیستي مراسمو کې دننګرهار ولایت د کرنې، اوبولګولو او مالدارۍ ریس مولوی عبدالستار محمد سربېره د اطلاعات او فرهنګ، چاپېریال ساتنې، مستوفیت او ملي رادیوتلویزون رییسانو، ځوانانو او د رسنیو مسؤلینو برخه درلوده.
د ننګرهار دکرنې، اوبولګولو اومالدارۍ رییس مولوی عبدالستار محمد وویل چې سږ کال په ننګرهار کې په مختلفو قوریو کې د هېواد د سرسبزۍ او ښکلا په موخه پنځه میلونه او ۵۰۰ زره مېوه لرونکي، بې مېوې او زینتي نیالګي تربیه او وېش ته اماده شوي.
محمد زیاته کړه، چې له دې ډلې ۲۶۴ زره مختلف النوعه نیالګي د کرنې ریاست اړوند په دریو روزنځایونو کې روزل شوي، چي د لایحې او طرزالعمل مطابق به هېوادوالو، دولتي ادارو او عام المنفعه ځایونو ته د سرسبزۍ او ښکلا په موخه ورکړل شي.
