لغمان کې دکبانو ۴۰ نوي فارمونه جوړېږي

لغمان کې د کب روزنې فارمونه د ودې په حال کې ده او په تېرو څو کلونو کې په دغه ولایت کې د کبانو روزنې ډېر شمېر فارمونه جوړ شوي دي.
د لغمان دکرنې، اوبولګولو او مالدارۍ رییس الحاج مولوی محمدولي محسن وایي، چې په افغانستان کې د امریکا نړیوالې پراختیايي ادارې «USAID» په مالي لګښت په دې ولایت کې د کب روزنې ۴۰ نوي فارمونه جوړوي.
د لغمان دکرنې، اوبولګولو او مالدارۍ رییس مولوی محمدولي محسن وایي، چې د کب روزنې د دغو ۴۰ نوي جوړېدونکو فارمونو ټولیز لګښت ۱۹۷زره امریکايي ډالره ده، چې ددې ولایت په بېلابېلو سیمو کې جوړیږي.
ښاغلی محسن وویل، چې روان کال په دې ولایت کې د کبانو روزنې د فارمونو د پراختیا په پار یوشمېر پروژې په پام کې نویل شوي وې، چې په دغو پروژو کې پر فارم لرونکو د کبانو بچي وېشل او د کبانو روزنې نوي فارمونه جوړول شامل و.
ښاغلی محسن وایي، چې دغه جوړېدونکي فارمونه هر یوه یې د ۱۸۰۰ کبانو د روزنې وړتیا لري.
لغمان ولایت کې د کب روزنې ۴۰ نوي فارمونه په داسې حال کې جوړیږي، چې په دې وروستیو کې د کب روزنې د پراختیا په پار هلې ځلې ګړندي شوي دي.
په افغانستان کې د کب روزنې زرګونه فارمونه شتون لري، چې ډېری یې په کندهار، هلمند، ارزګان، ننګرهار، لغمان، بلخ او نیمروز ولایتونوکې دي.