د هلمند کرنې ریاست کې سکټوري غونډه ترسره شوه

د هلمند ولایت د کرنې، اوبولګولو او مالدارۍ ریاست کې سکټوري غونډه ترسره شوه،  چې پکې ددې ادارې سره همکارو مؤسسو، د اقتصاد ریاست، کلیو بیارغونې او پراختیا ریاست، چاپیریال ساتنې ریاست او د نیشه یي توکو پر وړاندې مبارزې مديریت مسؤلینو برخه اخیستې وه. 
په پیل کې د هلمند د کرنې ریاست مسؤلینو لخوا خبرې وشوې او یادونه وشوه ، داچې د ا. ا. ا. د نافذه قوانینو له مخې د کرنې اداره مکلفیت لري ترڅو بزګرو، بڼوالو او ځمکوالو ته باکیفیته خدمات عرضه کړي ، نو په دې برخه کې دکرنې ادارې سره همکارو موسساتو او برنامو مسؤلین باید خپل ټول پروګرامونه ددې ادارې سره همغږي کړي ، د پروګرامونو او پروژو انتخاب باید له سیمې  صورت ونیسي او د بزګرو په اړتیاو باید کار وشي .  
ورپسې په غونډه کې د کرنې سکتور اړوند د ګڼو مؤسسو مسؤلینو د خپلو کړنو راپور وړاندې کړل، تر څنګ یې ستونزې او وړاندیزونه شریک کړل.
په وروستیو کې د چارو لا سمښت او همغږي کېدو په موخه د سکټور اړونده غړیو لخوا نظرونه، غوښتنې او سپارښتنې شریکې شوې.