د پکتیا دکرنې ریاست: د ځمکو د غصب د مخنيوي کميټې غړو د تېرې قومي مشرانو سره ناسته ترسره کړه
۲۹ لېندۍ ۱۴۰۱ه.ش
۲۶ جمادي اﻷول ۱۴۴۴ ه.ق
د پکتیا د کرنې، اوبولګولو او مالدارۍ ریاست وایي، چې ددې ولایت اړوند د ځمکو د غصب د مخنيوي کميټې غړو د مرکز ګردیز د تېرې مومین خېل، علي الدین خېل او غفورخېلو سیمو قومي مشرانو سره ناسته ترسره کړه.
په ياده ناسته کې د امارتي ځمکو د غصب د مخنيوي په اړه د اميرالمؤمنين فرمان او د ياد فرمان د تطبيق لپاره جوړ شوي طرزالعمل تشریح شو.
د غصب د مخنيوي کميټې غړو د تېرې قومي مشرانو وغوښتل، چې په ياده سیمه کې د غصب شويو ځمکو د حدودو د تثبيت، د غصب کوونکو د معلومولو او د غصب شويو ځمکو د مخنيوي په برخه کې له ټاکل شوې کميټې سره همکاري وکړي.
د يادولو وړ ده چې د غصب شويو ځمکو د مخنيوي کميټې غړي به خپلې عملې کړنې د لومړنيو معلوماتو د ترلاسه کولو وروسته ډېر ژر پيل کړي.
د غونډې په پای کې د ځمکو د غصب د مخنيوي کميټې غړو لخوا د یاد کلیو استازو ته استعلامونه هم ورکړل ترڅو استعلامونه ځواب کړي او تر دریو ورځو پوری قضاء امارت ته وسپاري.
