لغمان کې په ۲۷۲ بزګرانو د غنمو اصلاح شوي تخم او کیمیاوي سرې ووېشل شوې
۵ لېندۍ ۱۴۰۱ه.ش
۱ جمادي اﻷول ۱۴۴۴ ه.ق
د لغمان دکرنې، اوبولګولو او مالدارۍ ریاست د (DIA) مؤسسې په همکارۍ ددې ولایت د مرکز مهترلام ترڅنګ د علیشنګ، الینګار او قرغیو ولسوالیو په ۲۷۲ بزګرانو ۱۶.۳۲ ټنه د غنمو اصلاح شوي تخم، ۱۳.۶ ټنه یوریا او ۲۰.۴ ټنه ډي.اي.پي سرې وېشل شوي دي.
ددې مرستې په لړ کې هر بزګر ته ۶۰ کیلوګرامه د غنمو اصلاح شوي تخم، ۷۵کیلو توره سره او ۵۰ کیلو سپینه سره ورکړل شوي دي.
ددغو مرستو ترڅنګ برخمن شویو بزګرانو ته د غنمو د کښت او د کرکیلي په برخه کې لازمې لارښونې هم شوي دي.
ددې مرستې موخه په دې ولایت کې د غنمو حاصلاتو لوړوالی او د بېوزله بزګرانو ملاتړ او د دوی اقتصادي ودې ته زمینه برابرول دي.
