هلمند کې پر یوشمېر بزګرانو او بڼوالو اصلاح شوي تخمونه او د بڼوالۍ توکي ووېشل شول

۲۳ لړم ۱۴۰۱ه‍.ش
۱۹ ربیع‌الثاني ۱۴۴۴ ه‍.ق
د هلمند دکرنې، اوبولګولو او مالدارۍ ریاست د ملګرو ملتونو د پراختیایي پروګرام (UNDP) په مالي او د (ORCD) مؤسسې په تخنیکي همکارۍ ددې ولایت پر لسګونو بزګرانو او بڼوالو د غنمو اصلاح شوي تخمونه، کیمیاوي سرې او د بڼوالۍ اړونده توکي وېشلي دي.
دغه لړۍ د هلمند ولایت د ګرشک او نادعلي ولسوالیو نږدې ٨٢ مستحقو بزګرو او بڼوالو ته پلي شوه، چې له وړاندې د یوې ګډې کمیټې لخوا د یوې سروې له مخې تشخیص او د مستحقینو په لیست کې شامل شوي ول.  
د یادې پروسې له لارې هر بزګر ته ٥٠ کیلو ګرامه د غنمو اصلاح شوی تخم ، ٥٠ کیلوګرامه توره سره ، ٥٠ کیلوګرامه سپینه سره او د بڼوالۍ ټولکیټونه وېشل شوي دي.
د هلمند ولایت د کرنې اداره هڅه کوي تر څو د بزګرو، مالدارانو او بڼوالو سره د اصلاح شوو تخمونو، کیمیاوي سرو، کرنیزو اړینو توکیو او د نباتي ناروغیو مخنیوی تر څنګ په بېلابېلو برخو کې د مرستې او همکارۍ زمینه برابره کړي ترڅو له دې لارې په کرنیز اقتصاد کې بهبود او نوښت رامنځته شي.