د ننګرهار دوو ولسوالیو کې په ۳۵۰۰ بزګرانو د غنمو د اصلاح شویو تخمونه او کیمیاوي سرې ووېشل شوې

۱۵ لړم ۱۴۰۱ه‍.ش
۱۱ ربیع‌الثانی ۱۴۴۴ ه‍.ق
د ننګرهار ولایت دکرنې، اوبولګولو او مالدارۍ ریاست د ملګرو ملتونو د خوړو او کرنې ادارې( FAO)په مالي او د (Action Aid) مؤسسې په تخنیکي همکارۍ ددې ولایت د رودات او سرخ رود ولسوالیو په ۳۵۰۰ مستحقو بزګرانو د غنمو د اصلاح شویو تخمونو او کیمیاوي سرې وېشلي دي.
د چارواکو په خبره د روداتو ولسوالی په ۱۵۰۰ او د سرخ رود ولسوالی په ۲۰۰۰ بزګرانو یادې مرستې وېشل شوي دي.
ددې مرستې په ترڅ کې هر بزګرته ۵۰ کیلو ګرامه د غنمو اصلاح شوي تخم، ۵۰ کیلوګرامه ډي.پي.اي او ۵۰ کیلوګرامه یوریا سره ورکول کېږي.
ددې مرستې موخه په دې ولایت کې دکرنیزو محصولاتو زیاتوالی او د بېوزله بزګرانو ملاتړدی.
باید وویل شي، چې په نږدې راتلونکي کې  به یادو بزګرانو ته د غنمو کرلو، هرزه بوټو مخنیوي، اوبولګونې، د سرو استعمال،  ناروغیو او حاصل ټولولو په برخه کې روزنه هم ورکړل شي.