لغمان کې د سټروسو د نویو بڼونو جوړولو لړۍ پیل شو
د لغمان دکرنې، اوبولګولو او مالدارۍ ریاست د ملګرو ملتونو د خوړو او کرنې ادارې (FAO) په همکارۍ د خوړو خوندیتوب پروژې له لارې ددې ولایت د قرغیو په ولسوالۍ کې د ۲۰۰ جریبه لیمو بڼونو د جوړولو لړۍ رسماً پیل کړی دی.
د لغمان دکرنې رییس الحاج مولوی محمد ولي محسن وایي، چې ددې پروګرام په ترڅ کې د قرغیو په ولسوالی په بېلابېلو کلیو کې د لیمو ۲۰۰ جریبه نوي بڼونه جوړېږي.
ښاغلی محسن وویل، چې بڼوالو ته به د یاد دفتر په مټ د بوټو د ساتنې او پالنې په برخه کې وخت په وخت روزنه او سلا مشورې ورکول کېږي. هغه زیاته کړه: «یاد بڼوال په ۱۲ ګروپونو (CIGs) ک تنظیم شوي دي. د ګروپونو د ایجاد موخه دا ده چې بڼوال څنګه وکولای شي خپلې ستونزې له یوبل سره شریک او د حل غوره لارې چارې ورته پیدا کړي.»
د لغمان دکرنې رییس دغه راز وویل، چې یادو بڼوالو ته به راتلونکې کال کې د بڼوالۍ د تخنیکي کارونو د پرمخ بیولو لپاره یو لړ لازم او ضروري توکي هم ووېشل شي.
د یادونې وړ ده، چې د یادې پروژې له لارې د قرغه یې ولسوالی ۴۰۰ بې وزله او بې بضاعته کورنیو ته ۱۲ زره چرګان او ۱۲۰ ټنه د چرګانو دانه، دانه خوري او اب خوري هم وېشل شوي دي.
