په سوېل ختيځ زون کې د افغانستان لپاره د ناروې کمېټې د پروژو پېژند غونډه
۱۹ وږی ۱۴۰۱ه.ش
۱۳صَفَرالمظفّر ۱۴۴۴ ه.ق
د افغانستان لپاره د ناروې کمېټه په پکتيا، پکتيکا او خوست ولايتونو کې د خپلو پروژو پېژند غونډه د پکتیا ولایت د کرنې، اوبولګولو او مالدارۍ په رياست کې ترسره کړه، چې د ياد رياست رییس الحاج مولوي عبدالروف سعيد، د افغانستان لپاره د ناروي کميټې مسولينو، د پکتيا، پکتيکا او خوست ولايتونو د کرنيزو چارو آمرينو او د ترویج مديرانو پکې ګډون کړی وو.
د يادې کميټې مسولينو په پکتيا، پکتيکا او خوست ولايتونو کې د خپلو پروژو په اړه هر اړخیز معلومات د پريزينټيشن په ډول وړاندې کړل، چې پکې د اصلاح شويو تخمونو وېش، د چرګانو د فارمونو جوړول، د حیواني خوراکې وېش، د سبو د تخمونو وېش، د قوريې پالنې د وسایلو توزیع، پيسې د کار په مقابل کې او نورې پروژې شاملې دي، چې له مخې به يې لسګونه زره ګټه اخيستونکي مستقيمآ برخمن شي.
ښاغلي سعيد په خپلو خبرو کې په ياد زون کې د کرنې او مالدارۍ په برخه کې د يادو پروژو پر تطبيق د خوښۍ ترڅنګ له يادې کميټې سره د پروژو په تطبيق کې د هر راز همکارۍ ژمنه هم وکړه.
