د کابل شکردرې ولسوالی کې د ځمکې غصب سره د مبارزې کمېټې عملي چارې په چټکۍ روانې دي
۱۲ وږی ۱۴۰۱ه.ش
۶ صَفَرالمظفّر ۱۴۴۴ ه.ق
د کابل دکرنې، اوبولګولو او مالدارۍ ریاست وايي، چې په دې ولایت کې یې د ځمکې د غصب مخنیوي او د غصب شویو ځمکو بېرته راګرځولو په پار عملي چارې د نورو ولسوالیو او ناحیو ترڅنګ د شکردرې په ولسوالۍ کې هم پیل کړي دي، چې په ترڅ کې یې نږدې ۴۰۰ جریبه دولتي ځمکې له غاصبینو بېرته راګرځولي دي.
د چارواکو په خبره د شکردرې ولسوالی مقام، د قومندانۍ، عوایدو، اراضي او استخباراتو مدیرت د استازو په شتون کې پلاوي د کابل د شکردرې ولسوالی له بېلابېلو سیمو څخه د لیدنې پر مهال یوشمېر فرصت طلبو غاصبینو ته په غصب شویو ځمکو کې د کار د توقق امر وکړ او له دوی څخه د معتبرو اسنادو غوښتونکي شول.
یاد چارواکي وویل، هېڅ فرد يا ډله د دولتي ځمکو او جايدادونو د غصب حق نه لري او د سرغړونې په صورت کې به ورسره قانوني چلند وشي.
د دولتي ځمکو له غصب سره د مبارزې کمیټه د ولایت مقام، امنیه قوماندانۍ، د کرنې ریاست، د محکمو او څارنوالۍ، ښاروالۍ او د ښار جوړونې او ځمکو د ریاستونو له استازو څخه جوړه ده چې مشري یې دکرنې ریاست کوي.
